بتواعدنى
؛؛؛؛؛؛؛؛؛؛؛؛؛؛؛
مصر شالت لما قالت ياللا نبنى
لما زاد الظلم صرخت .. ابنى
ابنها اتعلق فى ديلها وقام نادلها
فجأة قالت يابنى سيبنى
ظهرى محنى والمرض لسه ملازمنى
روح ياابنى شوف حياتك
اللى بيَّا دا شئ تاعبنى وغصب عنى
قالها انا لسه صابر ع الوجع
ابنك جدعك
مهما يكون فيكى الطمع
بردو مناسبنى
وسنين ومرت والأمل لساه ضعيف
بقى شئ مخيف
انك فى يوم تصحى على ضياع الرغيف
ردت وقالت دا اللى جاى لساه كتير
اجمد كدا خليك أمير
دا انا ظهرى محنى من زمان
وما اشتكيت
قوم انت جيت
تلعن جدودى وتحنى عودى
وما ارتويت
لساك بتشكى وبتحاسبنى ؛
ابعد وسيبنى
طب أعمل ايه ؟ اسأل أخوك
فى ناس خانوك
خلوك تاعبنى
انا من زمان سايبه الاراده بين ايديك
فتح عينيك
لو جبت لك ريس عليك
دايما تطبل له بايديك
وتحط صورته عل الكبارى والمبانى
قصاد عينيك
لو يوم تعنّى أنا كنت أعينك
ضيعتنى وتاهت سنينك
طب ايه هقولك بعدها
ماانتش لازمنى
ولا هتناسبنى
وأوعاك تفكر يوم تثور
روح يابنى غور
واطلق بخور
واعملى حفله وفيها زار
انا يابنى خيرى كتير .. وطار
شكلك حمار وبتلاعبنى
انا يابنى بأبنى
رغم الوجع لساك تاعبنى
وبتلاعبنى
فى شئ راعبنى
انك تكون واقف فى ظهرى
وبتواعدنى
وألاقيك فايتنى
؛؛؛؛؛؛؛؛؛؛؛؛؛؛؛؛؛؛؛؛؛؛؛؛
بقلمى .. طلعت عامر
ليست هناك تعليقات:
إرسال تعليق